Plantun de Prouvènço

Pèr coumpara dos planto d'encò nostre

Anagyris foetida & Euonymus europaeus

Bos-pudènt

Anagyris foetida

Fabaceae Leguminosae

Autre noum : Erbo-dóu-faiòu.

Noms en français : Anagyre fétide, Bois puant.

Descripcioun :
Lou bos-pudènt es un aubret de 1 à 4 mètre, rare, que trachis proche d'anciàni fourtificacioun (abadié, fort, oppidum...) ounte es esta planta i'a d'an. Sèmblo veni de Grèço. Flouris d'ouro dins l'ivèr emé de flour, groupado pèr 3, jauno e sedouso, coume li jóuini ramo e lou dessouto de fueio. Lou noum vèn que lou bos pudis, subretout li jóuini ramo. La planto èi marcado sus la listo roujo, categourìo VU (vulnerablo).

Usanço :
Aleva li grano, touto la planto es empouisounanto, d'enfant soun esta empouisouna en manjant li dòusso que sèmblon (un pau !) de baneto. Caup d'alcalouïde (anagyrine) qu'atacon li nèrvi e empachon pau à cha pau l'alenamen. Pèr acò, s'en fau proun mesfisa dins li preparacioun de poutingo.

Port : Aubre
Taio : 1 à 4 m
Fueio : coumpausado
Tipe bioulougico : Faneroufite
Cicle bioulougico : Planto renadivo

Gènre : Anagyris
Famiho : Fabaceae
Famiho classico : Leguminosae

Ordre : Fabales

Coulour de la flour : Jauno
Petalo : irreguliero
Ø (o loungour) flour : 1,8 à 2,5 cm
Flourido : Printèms Ivèr

Sòu : Ca
Autour basso e auto : 0 à 300 m
Aparado : Noun
Remarco :
Febrié à Abriéu

Liò : Pendis roucaious
Estànci : Termoumediterran à Mesoumediterran
Couroulougi : Estenoumediterrano
Ref. sc. : Anagyris foetida L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.